الاهلى...والانتماء...وعيد الامارات....والحكومة

حبيت اتكلم فى الموضوع ده بعد مرور احداث امامى بداية من مباراة الاهلى والنجم الساحلى والاحداث كلها تشد الانتباه فى معنى وموضع الانتماء واللى شد انتباهى اليوم هوعيد اتحاد الامارات وهو عيد مثل اى عيد قومى فى اى بلد واجازة رسمية عادى يوم ممكن يعدى زى غيره بس هنا الوضع مختلف لاقيت اعلام البلد فى كل الشوارع بلا استثناء هاتقولى عادى ماهو الحزب الوطنى والقوى العاملة بيعملوا كده الشىء اللى شد انتبهاى فعلا احساس الناس هنا بالعيد واهتمامم بيه بطريقة شديدة وتلاحظها فى سياراتهم اللى تلاقى كتير منها رافع علم بلاده عليها وتلاقيها فى سيارة شوفتهاكلها قلوب حمراء وبيضا وخضرا وسودا وهى الوان علم الامارات يمكن تحس انى اختصرت معنى الانتماء فى الحاجات دى بس صدقونى الناس هنا منتمية بجد لبلدها تشوف احترامهم الشديد للمرور والنظام والنظافة وحسن المعاملة والاخلاق حتى لو كان الشخص سىء بس فى تعاملاته بيتعامل مع الناس كمواطن اماراتى ودى حاجة كبيرة جدا عندهم ...عاوزين بجد يبقوا شعب محترم هاتقولى دى دوله غنية واحنا دوله فقيرة هاقولك الموضوع ده ماتحسهوش فى كل دول الخليج وكلها دول غنية وكمان فى دول كانت فقيرة زى ماليزيا وشوف بانتمائهم لبلدهم غيروها ازاى...هاتقولى بتتكلم على الانتماء وانت سبت البلد هاقولك ان مش معنى انك منتمى لمكان تبقى فيه... ومش معنى انى منتمى لاسرتى انى لازم اكون فى البيت ع طول وفى ناس كتير برة البلد ومهاجرة وبتفيد وبترفع اسم البلد ومنتمية لبلدها اكتر من ناس كتير جواها.... المهم اللى عاوز اقوله ان بعد ماتش الاهلى والنجم الساحلى ظهرت حاجة خطيرة جدا ان نلاقى انتمائنا لنادى اقوى من انتمائنا لدينا وبلدنا تلاقينا كنا زعلانين جدا وفى ناس نامت من غير عشا وفى بيوت كانت اكيد هاتخرب وفى خناقات كتير حصلت وحاجات كتير ممكن اكتر من كده حصلت فعلا.. وممكن كان فى نفس الوقت مجزرة بتحصل فى العراق ولا فى فلسطين وشوفناها فى النشرة يومها ولااكن حاجة حصلت ونلاقى بعد الماتش فى منتديات الاهلى والاسماعيلى والزمالك بيانات كانها بيانات حرب وشماتة كاننا بجد خسرنا حرب وتلاقى منتديات الاهلى دعوة لمقاطعة عامة لمانجو ومصايف الاسماعيلية وتلاقى غير اللى شوفناه فى التليفزيون من بعض جماهيرالناديين ورخوجهم فى فرحة شديدة تلاقى كمان فى منتديات الاسماعيلى والزمالك اللى يقولك لو كانوا بيلاعبوااسرائيل كنا شجعناهم ...انا لله وانا اليه راجعون... ايه ده ليه ده كله علشان ماتش ...مش ممكن معنى الانتماء للبلدا اختصروه فى كده وبس ...مش عيب طبعا ان اننا تنتمى لكيان اى كيان بس ده ميكونش على حساب انتمائنا لديننا ولبلدنا...اى نعم فى ظروف كتير خلتنا نوصل للمرحلة دى من قلة الانتماء لبلدنا ومنها حتى فى الكورة ..يعنى لما كل كبار رجال الدوله يحضروا ماتش زى ده ويعدى ماتش الاسماعيلى وانيمبا النيجيرى فى نهائى برضه ومحدش يحضر ده اكيد بيزود الاحتقان..لماخريجى الجامعة يقعدوا ميلاقوش شغل ولو لقوا شغل يبقى ولا مناسب لمكانته ولامناسب لطموحه يبقى اكيد هايقل الانتماء..اللى عاوز اقوله ان الانتماء مسئوليه مشتركة بينا كلنا وهو الحل لانصلاح احوالنا واحوال البلد والخروج من حالة الهزيمة الحقيقية اللى مسيطرة على شعوبنا لو كل واحد فكر بس انه يبدا بنفسه بس ويغيرها ويحس بكل اللى حواليه ويجتهد فى عبادته وطاعته لربنا ويحب شغله ويجتهد فيه ويحس ان الشارع والاتوبيس والمترو ملكه ومسئول عنه..لو كل واحد ساب كلمة اشمعنى..لو كل واحد ساب كلمة مليش دعوة...لو كل واحد حس بانه على ثغر من ثغور دينه ومن ثغور بلده وانه لو ماجتهدش ودافع عن المكان اللى هو فيه العدو هايدخل منه... هانوصل فى الاخرلمعنى انتماء حقيقى نحسه فى بيوتنا وفى شوارعنا وفى شغلنا وفى مدينتنا وفبلدنا كلها وهانحب فعلا ساعتها بلدنا ونخليها كما كانت احلى بلاد الدنيا....